Amerikalı aktrisa Ancelina Coli  müəllifi Uinston Çörçil olan rəsm əsərini hərraca çıxarıb. Bu tablonu ona 2011-ci ildə keçmiş həyat yoldaşı Bred Pitt həddiyə edib...  

“Kutubiya məscidinin minbəri” adlı rəsm əsəri Britaniyanın keçmiş baş naziri Uinston Çörçilə məxsusdur. Bu, müəllifin ikinci dünya müharibəsi dövründə tamamladığı yeganə tablodur. 1943-cü ildə Mərakeşin Kasablanka şəhərində keçmiş Amerika prezidenti Franklin Ruzveltlə görüşən Çörçil onu dağlarda qüruba tamaşa etməyə aparır. Elə həmin mənzərənin təəssüratıyla “Kutubiya məscidinin minbəri” əsəri yaranır.

Çörçil bu əsəri Ruzvelt üçün çəkib. Bu, iki liderin dostluğunun rəmzi olmaqla yanaşı, həm də Britaniya və Amerika arasındakı əlaqələrin  göstəricisi kimi qiymətləndirilir. Əsəri qiymətli edən əsas amillərdən biri Çörçilin Şimali Afrika mənzərələrinə digər əsərlərindən daha çox dəyər verməsi olub.

40 yaşından rəssamlığa başalayan Çörçil ilk dəfə 1935-ci ildə Mərakeşə səfər edib və  burada 45-ə yaxın tablo yaradıb.  Mütəxəssislərin sözlərinə görə, həmin dövrdə müəllif bir çox məşhur rəsssamlıq cərəyanının təsiri altında olub. Lakin “Kutubiya məscidinin minbəri” əsərini məhz post-impressionist üslubda kətana köçürüb. Ümumiyyətlə, Çörçil 500-dən çox rəsm əsərinin müəllifi olub. Ancelina Colinin ailə kolleksiyasına aid olan bu tablonun ilkin qiyməti 2 – 3 milyon dollar nəzərdə tutulub. Kristis hərrac evində satış isə martın 1-dən başalnacaq.

Xavər Zairova