Aktyor Andrey Myaqkov - Ölməz romantik...

18 Fevral, 16:57 Sosial mediada paylaşın:

 «İşdə məhəbbət macərası», «Taleyin ironiyası və ya həmişə təmizlikdə», «Qaraj», «Qəddar romans» və neçə-neçə bədii filmlərdə bir-birindən maraqlı obrazlar yaradan Rusiyanın Xalq artisti Andrey Myaqkov dünyasını dəyişib...

Az tamaşaçı tapılar ki, yeni ilini «Taleyin ironiyası və ya həmişə təmizlikdə» filmilə qarşılamasın. Filmin ssenarisi, rejissor işi, musiqisi və hətta əsas rolun ifaçılarından olan polyak aktrisa Barbara Brılska nə qədər gözəl olsa da, ekran əsərinin uğur qazanmasının ən böyük səbəblərdən biri cərrah Jenya Lukaşin rolunu yaradan aktyor Andrey Myaqkov idi.

Aktyorun plastikası, yüksək peşəkarlığı ona imkan verdi ki, iki hissəli filmdə təkcə Nadya Şevelyovanın deyil, milyonların ürəyini fəht eləsin. Andrey Myaqkov uzun illərdir ki, tamaşaçılarına hər yeni il axşamı «həmişə təmizlikdə» deyir. 

Rejissor Eldar Ryazanov sevimli aktyorlarından olan Andrey Myaqkovu növbəti filminə - «İşdə məhəbbət macərası»na dəvət edir. O, bu dəfə kinomatoqrafiyada ən maraqlı məhəbbət macərasını Novoseltsev obrazında nümayiş etdirir.

Hər kəs onu komik rolların mahir ifaçısı kimi tanısa da, aktyor «Turbinlərin günləri»ndə, «Karamazov qardaşları»nda və digər ekran əsərlərində, həmçinin çalışdığı «Sovremennik» daha sonra Çexov adına Moskva Bədii Teatrında yaratdığı onlarla obrazıyla dram janrında istedadını nümayiş etdirə bilib.

O, həm də yazıçı, rəssam idi. Bir neçə detektiv romanlarının müəllifi olan aktyor yazmağının səbəbini özünəməxsus tərzdə izah edirdi. Deyirdi ki, oxumaq üçün həyat yoldaşına maraqlı ədəbiyyat çatmır.

İndi onun ömrü kino lentə, yazıları ədəbiyyata keçdi. Aktyorun ruhuna ehtiramla.

 

Ülviyyə Heydərova

CANLI YAYIM