Azərbaycan Dövlət Teatr Muzeyinin və Azərbaycan Teatr Xadimləri İttifaqının birgə təşkilatçılığı ilə 2021-ci il fevral ayının 4-də Cəfər Cabbarlı adına Azərbaycan Dövlət Teatr Muzeyində “Şöhrət” ordenli Xalq artisti, Əliabbas Qədirovun 75 illik yubileyinə həsr olunmuş xatirə gecəsi keçirildi. Gecədə mədəniyyət və incəsənət xadimləri, media nümayəndələri və aktyorun ailə üzvləri iştirak etdi.
Tədbiri giriş sözü ilə Cəfər Cabbarlı adına Azərbaycan Dövlət Teatr Muzeyinin direktoru, əməkdar mədəniyyət işçisi Sevinc Mikayılova açdı və gecəni aparmaq üçün sözü muzeyin əməkdaşı Suğra Ələkbərliyə təqdim etdi.
Tədbirin gedişatında Azərbaycan Teatr Xadimləri İttifaqının sədr müavini, Xalq artisti Hacı İsmayılov Əliabbas Qədirov haqqında xatirələrini, ürək sözlərini bölüşərək aktyorun sənət yolundan, teatrda baş verən səhnəarxası faktlardan söhbət açdı. Eyni zamanda Ə.Qədirov kimi bir sənətkarla həyatdakı dost münasibətlərindən və səhnədəki tərəf müqabilliyindən qürur hissi keçirdiyini qeyd etdi.
Ardınca əməkdar incəsənət xadimi Aydın Talıbzadə öz çıxışında Ə.Qədirovun teatr tarixində tutduğu mövqedən danışdı, onun kino rollarından, xüsusilə “Nəğmə dərsi” filmində məharətlə yaratdığı ata obrazından söz açdı.
Tədbir iştirakçılarından televiziya rejissoru, əməkdar incəsənət xadimi Məhərrəm Bədirzadə Ə.Qədirovla bağlı xatirələrini bölüşərək onun teletamaşalardakı çəkilişlərindən, televiziya verilişlərindəki peşəkar aparıcılıq qabiliyyətindən, parodiya yaratmaq bacarığından maraqlı hadisələr danışdı.
Ə.Qədirovun tədbirdə iştirak edən ailə üzvlərindən qızı Gülçin xanım atası ilə bağlı xatirələrini qonaqlarla bölüşdü.
Tədbirdə Ə.Qədirovun oynadığı teatr və televiziya tamaşalarından, çəkildiyi filmlərdən ibarət videoçarxlar nümayiş olunub. Həmçinin tədbir iştirakçıları Ə.Qədirovun yaradıclığını əks etdirən və muzeyin fondunda qorunan fotolardan ibarət sərgi ilə, eləcə də aktyorun səhnə geyimləri ilə tanış oldular. Tədbirin sonunda iştirakçılar xatirə şəkli çəkdirdilər.
Tədbir COVİD-19 pandemiyası ilə əlaqədar məhdud sayda auditoriya ilə təşkil olunmuş və həmçinin sosial məsafə, sanitar-gigiyena qaydalarına əməl edilmişdir.
