Aydın Qaradağlı... Azərbaycanda peşəkar diktorluq məktəbinin yaradıcısı. 

«Respublika radiosunun birinci proqramları ilə verilişimizə başlayırıq»...

Radio Aydın Qaradağlının alın yazısı idi. Qutudan yayılan səs onun üçün möcüzə idi. Səslərin sehrinə hələ uşaq yaşladından düşən Aydın Qaradağlı hətta bir dəfə radionu söküb, içindəki səsin canlı şahidi olmaq istəyib. O, 1945-ci ildə gəmiçilik məktəbini bitirsə də, birinci dərəcəli matros rütbəsi alsa da, dəniz dalğalarında deyil, radio dalğalarında üzməyi üstün tutur.

Aydın Qaradağlı sadəcə mətn oxumurdu, o, səsilə Azərbaycan radio tarixini yazırdı. Söz onun səsinə sevərək təslim olurdu. Söz onunla təkcə yola getmirdi, həm də məmnuniyyətlə, yol gedirdi. Aydın Qaradağlının səs yolu o qədər işıqlı idi ki… Amma o, səsi ilə göz qamaşdırmırdı.

Aydın Qaradağlı ifası ilə kimlərin sözünə işıq tutmadı? O, rəsmi xəbər də oxudu, klassiklərdən qəzəllər də səsləndirdi, hətta uşaqlar üçün də şeirlər söylədi.

Səs sahibi Aydın Qaradağlı səsə həssas olmaya bilməzdi. Ömrünü Azərbaycan Radiosunun səs sahiblərindən olan Gültəkin Cabbarlıyla bağlaması heç də təsadüfi deyildi.

Aydın Qaradağlı səsi ilə radio dalğalarında elə bu gün də üzür. O, Azərbaycan Radiosunun səs xəzinəsini elə zənginləşdirib ki, təkcə dinləyicilərin ruhuna su səpmir, səsiylə həm də öyrədir... 

Ülviyyə Heydərova