Bu gün xalq arstisti Hacı İsmayılov 77 yaşını qeyd edir

22 Yanvar, 16:07 Sosial mediada paylaşın:

Bəli, kinomuzun Mustafa müəllimidir o. Hamının sevimlisi, üzlərdə gülüş oyadan Şəki ləhcəsini bəlkə də ən gözəl danışan insan, aktyordur - Hacı İsmayılov. 77 yaşı olan aktyor bu gün də teatr səhnəmizə öz töhvəsini verir.

1944-cü il yanvarın 22-də Bakıda doğulan aktyor o vaxtki Mirzağa Əliyev adına Azərbaycan Dövlət Teatr İnstitutunun Dram və kino aktyorluğu fakültəsini bitirib. 1968-ci ildə Sumqayıt Dövlət Dram Teatrında fəaliyyətə başlayıb. 1970-ci ildən Akademik Milli Dram Teatrında çalışır. Ötən illərdə bu teatrın səhnəsində tamaşaçı rəğbəti qazanan onlarla xarakterik obraz yaradıb. Aktyorun 1977-ci ildə kinorejissor Rasim Ocaqovun ekranlaşdırdığı “Ad günü” filmində yaratdığı Mustafa obrazı ona geniş şöhrət qazandırıb.

Sonrakı illərdə sənətkar bir çox filmlərdə, televiziya tamaşalarında yaddaqalan rollar oynayıb. Filmlər arasından “Babamızın babasının babası”, “Bizim qəribə taleyimiz”, ”Fəryad”, ”Güllələnmə təxirə salınır”, ”Bəyin ogurlanması”, ”Həm ziyarət,həm Ticarət”, tamaşalardan isə H.Cavidin “İblis”, C.Məmmədquluzadənin “Ölülər”, Şekspirin “Maqbet” və bir sıra digər səhnə əsərlərində bir-birindən fərqli obrazlara can verib.

Hacı İsmayılov 1989-cu ildə respublikanın Əməkdar artisti, 2000-ci ildə Xalq artisti fəxri adına layiq görülüb. Prezident təqaüdçüsüdür. Azərbaycan Teatr Xadimləri İttifaqının təsis etdiyi "Sənətkar" medalına layiq görülüb. 2019-cu ildə “Şöhrət” ordeni ilə təltif olunub. Görkəmli sənətkarımız bu gün də Dram Teatrının səhnəsinə çıxıb dogma teatrından öz tamaşaçılarını salamlayır. Biz də xalq artistinə hər zaman gumrah, saglam teatrımızın səhnəsində olmagı arzu edirik.

 

Gülnar İlqarqızı

CANLI YAYIM