Bu gün görkəmli kinorejissor Eldar Quliyevin doğum günüdür. 80 yaşı tamam olan kinorejissorun həyat və yaradıcılığına nəzər salaq.

Eldar Quliyev kino sənətimizin saylıb-seçilən sənətkarlardandır. Onun incəsənətə gəlişi heç də təsadüfi deyil, o uşaqlıqdan musiqinin, sənətin  içində böyüyüb. Çünki o, Tofiq Quliyev kimi nəhəng bir bəstəkarın oğludur və onun yanında böyümək, musiqi ilə qidalanmaq sənətin içində olmaq üçün bəlkə də kifayət edirdi. Eldar Quliyev 1941-ci ildə Bakıda anadan olub. 1960-1966-ci illərdə Moskvada rejissorluq fakültəsində, Serqey Gerasimovun kursunda təhsil alıb. 1967-ci ildən "Azərbaycanfilm" kinostudiyasında işləyir.  İlk filmi "Biri vardı, biri yoxdu...” adlı qısametrajlı film olub. 1969-cu ildə ilk böyük ekran əsəri olan "Bir cənub şəhərində” filmi ilə Azərbaycan kinosunda yeni bir mərhələnin təməlini qoyub.

Rejissora uğur gətirən növbəti film 1979-cu ildə lentə aldığı "Babək” filmi olur. Film o illərdə 52 ölkə tərəfindən satın alınıb.

Bunlarla yanaşı, "Ən vacib müsahibə”, "Var olun, qızlar...”, "Nizami”, "Nə gözəldir bu dünya...”, "Girov”, ”İstanbul reysi”, "Dərvişin qeydləri”, "Bizim Nəsibə xanım”, "Sevinc buxtası”, "Şəhidlik zirvəsi” və bu kimi s. filmlərə quruluş verib. Kinorejissor, həmçinin, bir neçə filmin ssenari müəllifidir. Çəkdiyi filmlərin bir neçəsi kinofestivallarda mükafatlara layiq görülüb. "Şöhrət” və "Şərəf” ordenləri ilə təltif olunan Xalq artisti Eldar Quliyev hazırda Azərbaycan Dövlət Mədəniyyət və İncəsənət Universitetində kino kafedrasının professorudur. 80 yaşını qeyd edən görkəmli rejissorumuza biz də can sağlığı, uzun ömür arzu edirik.

Gülnar İlqarqızı