Nadir cizgi romanı nüsxəsi hərraca çıxarılacaq

14 Yanvar, 15:37 Sosial mediada paylaşın:

Dünyaca məşhur komiks qəhrəmanı, siması uşaqdan böyüyə hər kəsə tanış olan macərapərəst Tintinin təsvir olunduğu orijinal rəsm əsəri hərraca çıxarılacaq. Böyük marağa səbəb olan rəsmin 2 milyon avrodan baha qiymətə satılacağı gözlənilir.

Belçikalı animator Jorj Reminin yaratdığı sevimli obraz Tintin və onun sadiq iti Snoui 20-ci əsrin ən məşhur qəhrəmanları olub. Herge (Eğji) təxəllüsü ilə cizgi romanları hazırlayan Jorj Remi “Tintinin macəraları” komiksini ilk dəfə 1929-cu ildə təqdim edib. 50 ildən çox müntəzəm nəşr olunan komiksin müxtəlif vaxtlarda televiziya, radio, teatr və kino üçün fərqli adaptasiyaları yaranıb. Komiksin qəhrəmanı cəsur Tintin belçikalı macərapərəst jurnalistdir. Dostu Snoui ilə apardığı araşdırmalar zamanı təhlükələrlə üzləşir, qeyri-adi sərgüzəştlər yaşayır... Fransanın paytaxtı Parisdə isə  sevimli qəhrəmanların əks olunduğu orijinal rəsm əsəri “Artcurial” hərrac evində satışa çıxarılacaq. Nadir nüsxə olan bu əsərin 2.8 milyon avroya satılacağı ehtimal olunur. Eğji bu rəsmi “Tintinin uzaq şərqdəki macəraları-Mavi Lotos” adlı komiksinə üz qabığı kimi hazırlasa da  redaktor Jan Pol Kasterman qəbul etməmişdi. Çünki 4 müxtəlif rəngin istifadə olunması üçün mürəkkəb quruluşlu çap maşını lazım idi. Eğji isə rəsmi redaktorun 7 yaşlı oğluna bağışlamışdı. O isə rəngli əsəri ölənə qədər özündə saxlamışdı. Qeyd edək ki, 2014-cü ildə Parisin “Artcurial” hərrac evi 1937-1958-ci illər arasında nəşr olunan Tintinin macəralarına aid komikslərini rekord qiymətə satmışdı. Bəzən incə yumor, bəzən də satira ilə işlənən seriayalar indi də kolleksiyaçıların diqqət mərkəzindədir

CANLI YAYIM