Mədəniyyət nazirliyində əməkdaşlıq əlaqələri müzakirə olunub

8 Yanvar, 15:28 Sosial mediada paylaşın:

Mədəniyyət Nazirliyi beynəlxalq və yerli təşkilatlarla əməkdaşlıq istiqamətində onlayn görüşlər keçirib. Görüşlərin əsas məqsədi işğaldan azad olunmuş torpaqlarımızda mədəni irsin monitorinqinin reallaşdırılması barədə məsələlərin və Qarabağda mədəni həyatın dirçəldilməsi üzrə aparılan işlərin müzakirəsi olub.

Azərbaycanın düşmən işğalından azad olunan torpaqlarında yenidənqurma, bərpa və tarixi irsin monitorinqi prioritet məsələ olduğundan Mədəniyyət Nazirliyi beynəlxalq və yerli təşkilatlarla əməkdaşlıq istiqamətində bir neçə görüş keçirib. Nazirliklə BMT və təşkilatın ixtsaslaşmış qurumları arasında reallaşan onlayn görüşdə Mədəniyyət naziri Anar Kərimov və  BMT-nin İnkişaf Proqramının rezident nümayəndəsi Qulam İsakzai iştirak edib. Müzakirə zamanı Mədəniyyət naziri son dövrlərdə erməni işğalından azad edilmiş ərazilərdə mədəni irsin monitorinqi üçün missiyanın həyata keçirilməsi ilə bağlı  UNESCO-ya olunan müraciətlərin cavabsız qaldığını bildirib və Qulam İsakzaidən bu məsələyə aydınlıq gətirilməsini xahiş edib. İsaqzai ölkəmizin mövqeyini anlayışla qarşıladığını və 44 günlük müharibə ərzində baş verən hadisələr və azad edilmiş ərazilərdə real vəziyyət haqqında BMT qurumlarına obyektiv məlumatlar çatdıracağına davam edəcəyini bildirib. Mədəniyyət naziri həmçinin Dağlıq Qarabağın Azərbaycanlı İcması İctimai Birliyinin sədri Tural Gəncəliyevlə də onlayn formatda görüşüb. Görüşdə gələcək əməkdaşlıq və birgə layihələr barədə müzakirələr aparılıb. Xüsusilə işğaldan azad edilmiş ərazilərdə ölkə rəhbərliyinin müəyyən etdiyi istiqamətlər üzrə görüləcək işlər nəzərdən keçirilib. Tural Gəncəliyev Şuşanın Mədəniyyət Paytaxtı olması, bu il Şuşada təşkil olunacaq “Vaqif Poeziya Günləri” və “Xarı Bülbül” Festivalının əhəmiyyətini qeyd edərək bildiri ki, bütün bunlar Qarabağın tarixi simasının müxtəlif istiqamətlərdə bərpa olunması üçün vacib addımlardır.

CANLI YAYIM