Prezident İlham Əliyevin Sərəncamına əsasən 2021-ci ilin Azərbaycanda “Nizami Gəncəvi ili” elan edilməsi münasibətilə Gəncədə ilk tədbir keçirilib. Müdafiə Nazirliyinin təşkilatçılığı ilə keçirilən tədbirdə bildirilib ki, Nizami Gəncəvinin yubileyinin dövlət səviyyəsində keçirilməsi ölkəmizdə milli mədəniyyətə diqqət və qayğının daha bir parlaq nümunəsidir.

Yanvarın 6-da Müdafiə Nazirliyinin təşkilatçılığı ilə dünyaşöhrətli şairin yaşayıb yaratdığı doğma şəhəri Gəncədə bir qrup hərbi qulluqçu Nizami Gəncəvinin məqbərəsini ziyarət edərək xatirəsini ehtiramla yad edib, məzarı üzərinə gül dəstələri düzüblər. Ziyarətçilərə Nizami ziyarətgahı ilə bağlı ətraflı məlumat verilib. Gəncə Qarnizonu İdeoloji və Mədəniyyət Mərkəzində keçirilən “dəyirmi masa”da bilidirlib ki, “Nizami Gəncəvi ili” elan edilməsi bütün xalqımız kimi, Azərbaycan Ordusunun şəxsi heyətinin də böyük ruh yüksəkliyinə səbəb olub. Prezidentin bu Sərəncamı birlik, birləşmə, hərbi hissə və xüsusi təyinatlı təhsil müəssisələrində şəxsi heyətin nəzərinə çatdırılıb. Sərəncamın dahi şair və mütəfəkkir Nizami Gəncəvinin anadan olmasının 880 illiyi ərəfəsində bəşəri əhəmiyyət kəsb etdiyi, tarixi hadisə olduğu vurğulanıb. Diqqətə çatdırılıb ki, bəşəri dəyərləri vəsf edən, yaradıcılığı bütün bəşəriyyətə məxsus olan böyük Nizami Gəncəvinin irsini təbliğ edən layihələr ölkə Prezidentimiz İlham Əliyevin rəhbərliyi ilə 2021-ci ildə davamlı olacaq.