98 yaşında dünyadan köçən dəb mütəxəssisi milyard dollarlarla gəlir əldə edən brendin sahibi idi...

İtaliyada anadan olsa da 2 yaşından Fransaya köçən Pyer Karden gənclik dövründə məşhur dəb jurnallarında işləyib. 50-ci illərdə şəxsi moda evini açan dizayner qeyri-adi yaradıcıllıq istedadı ilə rəğbət qazanıb. Geyimdə kosmik üslubun yaradıcısı kimi tanınan Karden köpük formalı libasları, yaxalıqsız pencəkləri ilə dəb aləminə yenilik gətirib. Əlvan corablar, uzunboğaz çəkmələr, mini sarafanlar, güllü qalstuklar dar şalvallar da Pyer Karden təxəyyülünün məhsuludur. Dünyaca məşhur Bitlz qrupunun üzvləri də sənətkarın dizayn verdiyi geyimlərdən istifadə ediblər. Pyer Karden gördüyü rəngarəng işlər, bir-birindən fərqli layihələri ilə 60-cı illərin sonunda dəb aləminin hüdudlarını aşır. Belə ki, artıq bir çox məişət texnikası, elektron məhsulları onun adı altında istehsal olunmağa başlayır. Bunun nəticəsində, Pyer Karden brendi bütün dünyada geniş yayılır. Müxtəlif səhnə əsərlərinə kostyumlar hazırlayan kuturye, həm də Parisdə ilk mebel mağazasının sahibi olub. 2009-cu ildə BMT-nin xoşməramlı səfiri seçilib. Parisdə modelyerin kolleksiyalarından ibarət muzey də açılıb. Genişmiqyaslı fəaliyyəti ilə  dəb dünyasına böyük təsir göstərən Pyer Karden 2020-ci ilin 29 dekabrında vəfat edib. Onun yeniliklərlə zəngin yaradıcılığı həmişə olduğu kimi bu gün də müasir dizaynerlərin ilham mənbəyidir.