Arxeoloqlar qədim Pompey şəhərində maraqlı tapıntıya rast gəliblər. Belə ki, eramızın 79-cu ilində Vezuvi vulkanının güclü püskürməsi nəticəsində sakinləri ilə birlikdə külün və lavanın altında qalaraq məhv olan Pompeydə qədim dükan qalıqları aşkarlanıb.

Tədqiqatçılar freskalarla bəzədilmiş dükan qalıqlarına əsasən, burada yemək və içki satıldığını müəyyənləşdiriblər. Termopoli kimi tanınan dükanın adının tərcüməsi də isti içkilərin satıldığı yer mənasını verir. Bura bir növ küçədə yeməkxana xidməti göstərən müasir mağazaların ekvivalenti kimi qiymətləndirilib. Hətta qazıntılar nəticəsində oyuqlarda yerləşdirilmiş qabların içlərisində yaşı 2000 ildən artıq olan yemək qalıqları tapılıb. Qeyd edək ki, Pompey şəhəri yunan-roma mədəniyyətinin nadir nümunələrindəndir və İtaliyanın əsas tarixi məkanlarından biri kimi UNESCO-nun ümumdünya İrs Siyahısına daxil edilib.