"Qala" Dövlət Tarix-Etnoqrafiya Qoruğunda və İçərişəhərdə qədim "qurama" sənəti bərpa olunur.
“Bu qala bizim qala, tikdim ki, izim qala. Qala kəndi qədim tikiş sənəti olan “Quramanı” unutmağa qoymur. Zəngin və rəngarəng, həndəsi ornamentli naxışların üstünlük təşkil etdiyi qurama bədii tikmə növü Azərbaycanın dekorativ sənət mədəniyyətində özünəməxsus yer tutur. Bu tikmə növü əvvəllər parçaya qənaət məqsədilə istifadə olunsa da sonralar bədii sənətkarlıq növünə çevrilib.
"İçərişəhər" Dövlət Tarix-Memarlıq Qoruğu İdarəsinin və Əmək və Əhalinin Sosial Müdafiəsi Nazirliyi yanında Dövlət Məşğulluq Agentliyinin təşəbbüsü ilə qurama sənəti yenidən bərpa olunur. Qeyd edildi ki, layihənin həyata keçirilməsində məqsəd XX əsrin əvvəllərinə qədər geniş istifadə olunan, lakin fabrik istehsalının artması ilə unudulmaq təhlükəsi yaşayan qurama sənətinə yeni həyatın verilməsi və dünyada tanıdılmasıdır.
"İçərişəhər" DTMQİ-nin İdarə Heyətinin sədri Əsgər Ələkbərov: “İnanıram ki, biz bu sənətdə fəaliyyət göstərən sənətkarların nə vaxtsa nümayiş etdirə biləcəyik beynəlxalq tədbirlərdə. Eyni zamanda çox mühüm sosial istiqamət var bu layihənin. Xanımlarımız üçün dayanıqlı uzunmüddətli iş yerlərinin açılmasıdır”.
ƏƏSMN-i Yanında Dövlət Məşğulluq Agentliyinin idarə heyətinin sədri Mustafa Abbasbəyli: “Bir neçə işçi şəxslərimizə müvafiq istehsal xidmət avadanlıqlar tətbiq edərək və təqdim edərək bu istiqamətdə kiçik biznes yaradaılmasında iştirak etdik. Və hesab dirik ki, bu əməkdaşlıq çərçivəsində yaradılan aktivlər kifayət qədər uğurlu olacaqdır”.
"Qala" Dövlət Tarix-Etnoqrafiya Qoruğunda xalq sənətkarlığının inkişafı və Xəzər rayonunda yaşayan işsiz qadınların məşğulluğunun təmin edilməsi məqsədilə başlayan bu layihəyə Qala qəsəbə sakinlərindən 7 qadın cəlb edilib.
Qala sakini Sevda Məmmədova: “Qurama işi nənələrimizdən bizə yadigardır. Nəsilnən gələn bir əl işidir. Bu qurama işi belədir, həm əsəbləri sakitləşdirir. Bütün nə fikrin varsa hamısını dağıdır... Kənd sakinləri üçün iş yeri açılıb... Tək Qurama işi ilə kifayətlənməyəcəyik. Bizdə güləbətin də olacaq. Qurama da olacaq, xalçaçılığımız da var”
Layihə çərçivəsində qurama tikmə sənətini interaktiv turlara daxil etməklə "Qala" qoruğunda yerli və xarici turistləri maraqlandıracaq ustad dərsləri də təşkil olunacaq.
Ülviyyə Heydərova
