Görkəmli kinorejissor Andrey Tarkovskinin “Kino sənətinin sirləri haqqında” kitabı ilk dəfə azərbaycan dilində nəşr edilib. Kitaba müəllifin sənət barədə düşüncələri, elmi-nəzəri məqalələri, mühazirələri, çıxışları və müsahibələri daxil edilib.

“Kino cəmiyyətin aynasıdır”, “Kino rejissorluğu üzrə mühazirələr”, “Sənət ideal axtarışında”, “Həkk olunmuş zaman”, “Sənətkar məsuliyyəti”, “Həsrətdən sonra”, “Kino sirli aləmdir”, “Görüşlər, çıxışlar, müsahibələr” adlı fəsillərdən ibarət kitabda kino aləminin görünən və görünməyən tərəfləri, aktyorluq və rejissorluq peşəsinin gizli qatları, kino sənətinin insana və cəmiyyətə təsiri kimi yaradıcılıq incəlikləri dərin təhlil və araşdırmalarla izah edilir. Qeyb edək ki, Andrey Tarkovski kino və teatr rejissoru, nəzəriyyəçisi, ssenari müəllifi kimi zəngin yaradıcılıq irsinə malikdir. İlk ekran əsəri – “İvanın uşaqlığı” filmi dünya kinosunda böyük hadisə kimi qəbul olunub, məşhur Venesiya kinofestivalının “Qızıl şir” mükafatına layiq görülüb. Vim Venders, Aleksandr Sokurov, Lars fon Trier kimi dünya şöhrətli rejissorlar çəkdikləri filmləri dahi sənətkarın xatirəsinə həsr ediblər.