“Xarı Bülbül” Yaradıcılıq Müsabiqəsinin qaliblərinin mükafatlandırma mərasimi 30-31 dekabr 2020-ci il tarixlərində onlayn formatda keçiriləcək. Peşəkar rəssamlar və həvəskar sənətkarlar müsabiqədə öz əsərlərini təqdim edəcəklər, toplanan bütün vəsait isə yaralı əsgərlərə və şəhid ailələrinə köçürüləcək.

Layihə 1-ci və 2-ci Qarabağ müharibələri şəhidlərinin xatirəsinə, eləcə də Azərbaycan xalqının şərəfli qələbəsinə həsr olunub. Dünya Azərbaycanlılarının Həmrəylik Günü - 31 dekabrda müsabiqə qaliblərinin mükafatlandırılma mərasimi ilə yanaşı Qarabağın simvolu - Xarı Bülbül çiçəyinə həsr olunmuş beynəlxalq xeyriyyə auksion da keçiriləcək. Hərracda rəsm əsərləri, kitablar, Xarı Bülbül təsviri olan aksessuarlar, döş nişanları və broşlar, milli suvenirlər və digər məhsullar nümayiş olunacaq. Qeyd edək ki, müsabiqənin məqsədi əlamətdar günlərdə - 27 dekabr - Anım Günü, 8 Noyabr - Zəfər Günü və 31 Dekabr - Dünya Azərbaycanlılarının Həmrəylik Günündə Azərbaycan xalqının birliyinin əlaməti olaraq Xarı Bülbül rəmzini taxma ənənəsini yaratmaqdır.