2010-cu ildən etibarən həyata keçirilən “Xalq əmanəti” layihəsi çərçivəsində növbəti kitabın təqdimatı olub. Xalqımızın mədəni irsinin qorunub gələcək nəsillərə ötürülməsi, mənəvi dəyərlərimizin dünyaya tanıdılması məqsədi daşıyan layihənin yeni nəşri Azərbaycan poeziyasının klassiki, Xalq şairi Zəlimxan Yaqubun yaradıcılığına həsr edilib.

“Zəlimxan Yaqub. Seçilmiş əsərləri” adlı topluda şairin poetik irsi, onun yaradıcı fəaliyyətinin müxtəlif mərhələləri əks olunub. Kitabın təqdimat mərasimində iştirak edən ziyalılar layihənin 20-ci nəşrinin ədəbiyyatımızda zəngin şeir ənənələrini yaşadan Zəlimxan Yaquba həsr edilməsini yüksək qiymətləndiriblər. Qeyd edilib ki, əsərlərində xalqımızın ali insani keyfiyyətlərini, əxlaqi dəyərlərini, mənəvi məziyyətlərini təcəssüm etdirən sənətkarın özündən sonra qoyduğu irs çoxşaxəli araşdırmalar üçün də böyük əhəmiyyətə malikdir. Tədbirdə şairin oğlu ilə bərabər, kitabın tərtibatçıları da iştirak ediblər.