Tural Hüseyin Mədəniyyət və İncəsənət Univeristetinin dizayn fakultəsini bitirib. Fotoqraf-rəssamın tarixə  özünəməxsus baxışları var. Onun işlərinin əsas məqsədi tarixi şəxsiyyətləri xalqa daha yaxından tanıtmaq və bəzi tarixi prosesləri daha dərindən anlamağa kömək etməkdir.

O, daha çox 19-cu əsrin sonu, 20-ci əsrin əvvəllərinə aid və Azərbaycanın sadə həyat tərzini əks etdirən şəkillərə daha çox üstünlük verir. Hər birini rəngləməyə başlamazdan öncə isə, həftələrlə o mövzunu araşdırır, yeni-yeni fotoşəkillər kəşf etməyə çalışır.

Tural deyir ki hər şəkili rəngləmək də olmur. Çünki bəzən oradakı elementlərin rəngini tapmaq ümumiyyətlə mümkün deyil. Amma elə fotolar da var ki, dəqiq rəngi tapmaq çətin olmur. Bir fotonu rəngləmək də düşündüyümüz qədər bir günə başa gəlmir. Bəzən günlər belə çəkə bilir. Şəkilləri öncə axtarıam və yaxud kimlərsə mənə göndərir, dostlar, tanışlar. Bilirlər ki, bu işlə məşgul oluram. Hətta bəzi şəkilləri rəgləməkdən imtina etdiyim zamanlar da olub.

Bir müddət əvvəl demək olar ki, bütün sosial şəbəkələrdə geniş yayılan özü cavan, sənəti isə qocaman olan nakam şairimiz Mikayil Müşfiqin rənglənmiş fotosu da sən demə, Tural Hüseyinə aiddir. Turalın dediyinə görə bu foto insanlar arasında onun gördüyü işə maragı qat-qat artırdı.

Gənc rəssamın rənglədiyi köhnə şəkillər arasında digər Azərbaycan məşhur şəxsiyyətlərinin fotolarına da rast gəlmək olar. Z.Tagıyev, Ə.Haqverdiyev, M.Rəsulzadə, bununla yanaşı köhbə Bakı, Neft buruqları İçəri şəhər, Bakı xalçası və digər tariximizi əks etdirən rənglənmiş fotolar var.  Qeyd edim ki, bu cür şəkilləri tapmaq da o qədər asan deyil. Bunun üçün Tural mütəmadi olaraq arxivlə, tariximizi əks etdirən muzeylərlə əlaqə saxlayır. Ən böyük arzusu isə yeni nəfəs verdiyi şəkillərdən ibarət  sərgi keçirməkdir.