Oktyabrın 4-də erməni işğalından azad edilən Xudafərin körpülərinin UNESCO-nun Ümumdünya İrs Siyahısına daxil edilməsi proseslərinə başlanılıb. Daha ətraflı əməkdaşımız Ülviyyə Heydərovanın süjetində.

Cəbrayıl rayonunun ərazisində Araz çayının şimal və cənub sahillərini birləşdirən Xudafərin körpülərinə uzun illər idi ki, ya arxiv materiallarından baxmaq olurdu, ya da İrandan Naxçıvana gedən yolda görmək mümkün idi. Bütün bu görüntülərdə yaralı keçmiş vardı. Körpülərin hər daşı qan ağlayırdı, həsrət çəkirdi.

Müharibə Xudafərin körpüsünün sanki alın yazısıdır. Elə birinci körpü də 1027-ci ildə Şəddadi hökmdarı Fəzl ibn Məhəmməd Rəvvadilərlə mübarizə aparmaq üçün inşa etdirmişdi. Bu körpülər hansı müharibələrin şahidi olmayıb ki? Körpü hətta Ağa Məhəmməd şah Qacarın Azərbaycana yürüşü zamanı bir hissəsi uçurulsa da, sonradan bərpa edilib.

Başı bəlalar görən Xudafərin körpülərinin alın daşına 27 il həsrət də yazıldı. 1993-cü ildə Cəbrayıl rayonu Ermənistan hərbi qüvvələri tərəfindən işğal edildikdən sonra Xudafərin körpüləri də dağıntılara məruz qaldı. Xudafərin körpüləri 27 il xudanın ümidinə qaldı. Körpülər Araz çayının bağrını yardı.

Şanlı Ordumuz nəinki Xudafərini azad etdi, üç rəngli bayrağımızı da sancdı. Xudafərini erməni vəhşiliyinin bəlasından qurtardı. İndi Xudafərin təkcə azad deyil. Azərbaycanın bu qədim memarlıq incisi hətta yaxın gələcəkdə UNESCO-nun Ümumdünya İrs Siyahısına da daxil edilə bilər.

“Bununla əlaqədar biz artıq nominasiya prosesinin hazırlanması ilə bağlı işlərə başlamışıq. İlk növbədə Xudafərin körpülərinin İNESCO-nun ilkin siyahısına daxil edilməlidir və bundan sonra da biz bu körpülərin sərhədyani olduğu üçün İran İslam Respublikası ilə birgə əməkdaşlıq etməklə onun ümumdünya irs siyahısına daxil edilməsi üzərində çalışacağıq” - deyə Mədəniyyət nazirinin birinci müavini, nazirin vəzifələrini müvəqqəti icra edən Anar Kərimov bildirdi.

Vaxtilə mübarizə məqsədilə inşa edilən Xudafərin körpülərinin bundan sonra müharibə görməməsi arzusu ilə:

Ülviyyə Heydərova