Ermənistan təcavüzkar siyasətini təkçə torpaqlarımıza qarşı yürütmür. Mənfur qonşularımız mədəniyyətimizi, incəsənətimizi və mətbəximizi də mənimsəmək arzusunda olublar.  İşğaldan azad olunan Qarabağ torpağının mətbəxi  Azərbaycanın ənənəvi milli mətbəx mədəniyyətinin tərkib hissəsidir. Qarabağın zəngin mətbəxini nümayiş etdirmək üçün  isə müxtəlif festivallar, sərgilər keçirilir.  

Azərbaycanın milli mətbəxinin, mədəniyyətinin təbliği məqəsdilə kulinariya festivalları təşkil olunur. Layihə çərçivəsində bütün bölgələrin mətbəxi nümayiş etdirilir. Bu dəfə keçiriləcək festivalın özəlliyi isə Qarabağ mətbəxinin məhz Qarabağın döyünən ürəyi - Şuşada təqdim edilməsidir. Azərbaycan Milli Kulinariya Assosiasiyasının təşkil etdiyi Beynəlxalq Kulinariya Festivalının 2021-ci il avqustun 10-dan 15-dək Şuşada keçirilməsi nəzərdə tutulur.

Milli Kulinariya Assosiasiyasının prezidenti Tahir Əmiraslanov festivalla bağlı fikirlərini bildirdi: "Artıq bir ay bundan əvvəl kulinariya festivalının Şuşada keçiriləcəyini elan etdik. İştirakla bağlı artıq neçə ölkədən müraciət də edilib".

"Məqsəd bizim kulunariya sənətimizin, Qarabağ mətbəxinin, ümumilikdə Azərbaycan mətbəxinin nümayişi və Azərbaycanın gücünün, kimliyinin nümayişidir. Orada Qarabağın hər bir regionunun mətbəxinin sərgisi olacaq, gələn qonaqlar o mətbəxi görəcəklər".

Tədbirin Şuşada həyata keçirilməsində məqsəd qonaqlara Qarabağın təbiətini, tarixi abidələrini, milli mətbəxini əyani şəkildə təqdim etməkdir.

Festivalda iştirak etmək üçün son müraciət tarixi 2021-ci ilin iyunun 1-nə dəkdir. Layihə şərçivəsində iştirakçılara Qarabağ mətbəxi adlı kitab da  təqdim ediləcək.

Gülnaz Hacıyeva, Nuran Ələkbərli, Pərvanə Ayxan