“Şuşada son çay”ın müəllifi Şuşaya ilk çayın fotosunu çəkməyə yollanır...

12 Noyabr, 16:20 Sosial mediada paylaşın:

Azərbaycan əsilli tanınmış fotojurnalist Rza Diqqəti  sentyabrın 27-dən başlayan Qarabağ müharibəsini işıqlandırmaq üçün ölkəmizə gəlib. İşğaldan azad olunmuş əraziləri, eləcə də Ermənistanın dinc əhalini raket atəşinə tutduğu bölgələrdə olan fotoqraf öz təəssüratlarını bölüşüb.

Fotoları “National Geographic”,  “Time photo” kimi tanınmış mətbuat orqanlarının üz qabıqlarını bəzəyən Rza Diqqəti müasir dövrün ən yaxşı fotoreportyorlarından biridir. Bir milyondan çox fotonun müəllifi olan R.Diqqəti Azərbaycanın başına gələn faciələri də fotolentin yaddaşına həkk edib. 90-cı illər Qarabağ müharibəsi dövründə döyüş gedən bölgələrdə - Şuşa, Zəngilan və Cəbrayılda baş verən hadisələri,  eləcə də Azərbaycan həqiqətlərini obyektivin gözü ilə dünya ictimaiyyətinin diqqətinə çatdırıb. Rza Diqqəti 2020-ci il 27 sentyabrdan başlayan Qarabağ müharibəsini işıqlandımaq üçün yenidən Azərbaycana gəlib.

"Mən artıq 3 həftədir ki, buradayam. Zəngilanda, Cəbrayılda, Füzulidə və Ağdam tərəfində olmuşam.  İndi isə Şuşaya gedirəm..."

Müzəffər ordumuzun işğaldan azad etdiyi ərazilərdə olan fotoreportyor 90-cı illərdə şahidi olduğu Qarabağ döyüşləri və bugünkü vəziyyət haqqında da fikrini bildirdi: "92-ci ildə ki, bura gəlmişdim, o zaman mən 12 ildən artıq idi ki, müharibə çəkirdim... Burada elə əsgərlər var idi ki, heç silah tutmağı belə bacarmırdı, amma düşmən tərəf daha güclü idi... Bir neçə həftədir ki, buradayam. Gördüklərim 92-ci ilin tam əksidir. Artıq Azərbaycan ordusu planla çox güclü halda irəliləyirdi... Düşmən tərəf kimi dinc əhalini vurmurdu..."

R.Diqqəti Tərtər bölgəsində mülki yaşayış obyektlərinə hücum zamanı istifadə olunan fosfor tərkibli bombaların partlayış anını da fotoaparatın yaddaşına həkk edib. Fotojurnalist dinc əhaliyə raketlərdən amansızcasına atəş açan ermənilərin Bərdədə törətdikləri cinayətləri də işıqlandırıb. Diqqəti 3 həftə ərzində səfər etdiyi bölgələrimizdə şahidi olduğu erməni vandallığından da danışdı:

"Elə vandalizm gördüm ki, başqa müharibələrdə belə görməmişdim... məscidləri dağıtmağı, məsciddə donuz saxlamağı və s... Sanki mədəniyyətə nifrəti ilə bu işləri görüblər. Mən istərdim ki, bütün dünya buna baxsın, UNESCO-dan gəlsinlər və bütün bunları görsünlər. Onların mədəniyyətə qarşı törətdikləri bu vandallığı təmizləmək lazım deyil... Əvvəl gərək bunların fotosu çəkilsin, sənədləşdirilsin, film halına salınsın... Lütfən, bunu bütün dünyaya çatdırın...

“Şuşada son çay” fotosunun müəllifi Rza Diqqəti 28 ildən sonra, yaxın günlərdə yenidən Şuşaya -  ilk çayın fotosunu çəkməyə yollanır...

 

Xavər Zairova

CANLI YAYIM