Mavi Səma üçün Təmiz Hava Günü münasibətilə ilk dəfə olaraq həvəskar və peşəkar fotoqraflar arasında eyniadlı fotoşəkil müsabiqəsi elan olunub.

Müsabiqə Ekologiya və Təbii Sərvətlər Nazirliyi, Birləşmiş Millətlər Təşkilatının İnkişaf Proqramı, Ekosfera Sosial-Ekoloji Mərkəzi və Azərbaycan Fotoqraflar Birliyinin (AFB) tərəfdaşlığı ilə keçirilir.

Müsabiqənin keçirilməsində məqsəd ictimaiyyətin ekoloji maarifləndirilməsinin təminatı və genişləndirilməsi, həvəskar və peşəkar fotoqrafların ətraf mühit məsələlərində iştirakının artırılması, hava çirklənməsinin əhalinin sağlamlığına təsirinin ictimailəşdirilməsi, iqlim dəyişmələri problemlərinə diqqətin cəlb edilməsi, ekoloji cəhətdən daha yaxşı bir gələcək naminə bilik və təşəbbüslərin artırılmasıdır.

Müsabiqəyə təqdim olunan şəkillər son 2 ildə çəkilmiş fotolar olmalıdır. Fotolarda atmosferin çirklənmə səbəblərinin işıqlandırılması, cəmiyyətin diqqətinin təmiz texnologiyalara və alternativ enerji mənbələrinə keçidə yönəldilməsi, Azərbaycan təbiətinə humanist rəftarın formalaşdırılması, ekoloji tərbiyə və mədəniyyətin aşılanması əks olunmalıdır. Müsabiqədə 15 yaşdan yuxarı yalnız Azərbaycan vətəndaşları fərdi qaydada iştirak edə bilər. Müsabiqəyə tək və ya seriya (5-10 şəkildən ibarət foto hekayə) fotolar göndərilə bilər. Təqdim edilmiş fotolar Azərbaycan ərazisindəki təbiət mənzərələri fonunda çəkilməlidir.

Fotoşəklin adı bölməsində müəllifin adı qeyd olunmalıdır. Müsabiqəyə təqdim olunan işlərdə işıq və kontrastın tənzimlənməsi istisna olmaqla kollaj və dizayn manipulyasiyalarından istifadə edilməməlidir.

İştirakçılar öz işlərini ərizə forması ilə birgə fotoekosfera@gmail.com elektron ünvanına göndərməlidir.

Əlavə məlumatı (+994) 55 582 40 09 (WhatsApp) nömrəsindən əldə etmək olar.