“Gülüş”, “Asya”, “Gülçöhrə”, “Rozina”, “Maddalena”... Azərbaycan Dövlət Opera və Balet Teatrının səhnəsində bir çox rolları ifa etsə də, onu “Azərbaycan opera sənətinin Karmeni” adlandırırlar. Azərbaycan Dövlət Opera və Balet Teatrının solisti, mezzo-soprano, Xalq artisti Fidan Hacıyeva bu gün - sentyabrın 7-də doğum gününü qeyd edir. Ad günü ərəfəsində görüşdük Fidan xanımla. Müsahibəmizə də elə ənənəvi sualla başladıq:

- Fidan xanım, ən yaddaqalan ad gününüz neçə yaşınızda olub və gözlənilməz hədiyyəniz? Ümumiyyətlə, ad günlərini qeyd etməyi xoşlayırsınız?

-  Ad günlərimi qeyd etməyi çox sevirəm. Fərq etmir, neçə yaşım olursa-olsun, həmin günü böyük maraq və həyəcanla gözləyirəm. Hədiyyə olaraq isə gülləri çox sevirəm. Xatırlayıram, evliliyimizin bir illiyində həyat yoldaşım mənə çox gözəl bir hədiyyə - musiqi açarı formasında sırğa verdi. Zərgərdir və sırğanı özü xüsusi dizaynla hazırlamışdı.

- Bəlkə də çoxları bilmir, siz həm də hərbçisiniz. Daxili İşlər Nazirliyi nəzdində Nümunəvi Hərbi Orkestrin rəhbərisiniz...

- Bəli, çox maraqlı və zəngin repertuarımız da var. Artıq 16 ildir ki, hərbçiyəm. Hətta rütbəm də var, kapitanam. Hərbçi olmağımla böyük qürur hissi duyuram.

- Fidan xanım, siz AzTV-də Bədii Şuranın üzvüsünüz. Təklif necə, kim tərəfindən gəldi?

- Təklif AzTV-nin rəhbərliyi tərəfindən gəldi mənə və çox sevindim. AzTV-nin indiki durumu məni çox sevindirir. Çox dəyişib, çox maraqlı olub. Maraqlı, baxımlı verilişləri var. Bunu kənardan eşidəndə çox böyük qürur hissi duyuram.

AzTV-də Bədii Şuranın iclasında

- Bəs yaradıcılığınızda hansı yeniliklər var?

- Mən həm Əhməd Bakıxanov adına 6 nömrəli musiqi məktəbinin, həm də yaratdığım Vokal Musiqi Məktəbinin direktoruyam. Uşaqlarla, tələbələrimlə yeni layihələrimiz var, ümumiyyətlə, uşaqlarla işləməyi çox sevirəm. Onlar klassik janrda ifa edirlər, mən də öz növbəmdə hər zaman onlara dəstək oluram. Hərbi orkestrlə yeni mahnılar, marşlar üzərində işləyirik. Opera Teatrında yeni mövsüm üçün yeni tamaşalar üzərində çalışırıq.

"Seviliya bərbəri" operasında Rozina obrazında

- Siz tək Azərbaycanda deyil, bir neçə ölkədə təhsil almısınız. Bir qədər tələbəlik illərinizdən danışardınız.

- Mən təhsilə hər zaman böyük önəm vermişəm, təhsil mənim üçün həmişə birinci yerdə olub. Bakalavr, magistr, aspirantura təhsilimi Azərbaycanda alandan sonra Moskvada SSRİ Xalq artisti opera müğənnisi İrina Arxipovanın ustad dərslərində dinləyici kimi iştirak etmişəm. İtaliyada 3 il dünyaca məşhur müəllimə, mezzo-soprano Bruno Balyonenin sinfini bitirmişəm. Bundan başqa, İtaliyada Kidjano Akademiyasında laureat olmuşam.

- Kidjano Akademiyası, ümumiyyətlə, Siyena şəhəri haqqında daha ətraflı danışmağınızı istərdik.  Bildiyimizə görə, ora ilə bağlı maraqlı xatirələriniz var.

- Kidjano Akademiyası İtaliyanın çox məşhur musiqi akademiyasıdır. Akademiya Siyena şəhərində yerləşir. Mən oranı bizim İçərişəhərə oxşadıram.  Çox qədim tarixə malikdir. Akademiyanın binası 1932-ci ilin memarlıq abidəsidir. Həyətində bir su quyusu var idi. Görürdüm ki, tələbələr ora hər zaman dəmir pullar atırlar. Maraqlananda dedilər ki, bu quyuya qəpik atıb arzu tutanda çin olur. Mən də gənc qız idim. Çox maraqlı gəldi. Əslində, belə şeylərə çox da inanmıram, sadəcə maraq üçün sınadım, arzu tutub qəpik atdım. Arzuladım ki, növbəti dəfə bura həyat yoldaşımla bal ayına gəlim. Təsadüf elə gətirdi ki, Bakıya dönəndəndən sonra həyat yoldaşımla tanış olub evləndik. Bal ayına da İtaliyaya – Siyenaya yollandıq. Bal ayında olarkən yenə akademiyaya gedib növbəti arzumu tutub qəpik atdım. Yenə də arzum çin oldu. Sonra yenə və yenə... Və orada tutduğum bütün arzularım çin oldu.

Fidan Hacıyeva ailəsi ilə

- Fidan xanım, artıq öz məktəbinizi yaratmısınız. Məktəbə tələbələri hansı əsaslarla qəbul edirsiniz?

- Bəli, artıq öz məktəbim var, istedadlı tələbələrim var. Məktəbin nəzdində kurslar da fəaliyyət göstərir. İstedadlı tələbələri mütləq qəbul edirik. Əgər az da olsa, istedadı varsa, onunla məşğul olub, kursa qəbul edib hazırlayıb, sonra da məktəbə qəbul edirik. 

- Sizi “Azərbaycan opera səhnəsinin Karmeni” də adlandırırlar. Opera səhnəsində “Karmen” uğuru qazanmaq üçün nə etmək lazımdır? Bildiyimizə görə, siz hətta Karmenin vətənində də olmusunuz. Təəssüratlarınızı bizimlə də bölüşərdiniz...

- Corc Bizenin “Karmen” operasını çox sevirəm. O opera mənə sənətdə çox böyük uğurlar gətirdi. Hər konsertdə də çalışıram ki, “Karmen”dən mütləq parçalar ifa edim. Opera olaraq çox çətindir. Məhz bu operaya görə mən fransız dilini və ispan rəqslərini oyrəndim. İspaniyaya gedib Karmenin yaşadığı və işlədiyi yerdə oldum. Düşünürəm ki, hər hansı bir operanı işləyirsənsə, onu mütləq dərindən öyrənməlisən, onunla yaşamalısan. Çünki opera çox çətin bir janrdır, bu janrda həm musiqi, həm də aktyorluq tələb olunur. Həm də böyük dünya görüşün olmalıdır.

"Karmen" operasında Karmen

- Fidan xanım, ad gününüzü təbrik edirik və maraqlı müsahibə üçün təşəkkür edirik.

- Mən təşəkkür edirəm. Çox sağ olun!

Gülər Sadıqova Şərifi