Haqqımızda

TV HAQQINDA

İnsanın tərbiyə almasında, mədəni-intellektual fərd kimi formalaşmaşında ailənin rolu nə qədərdisə, millətin də millət kimi formalaşmasında, zövqünün, mədəni səviyyəsinin yüksəlməsində telekanalların funksiyası eynidir.

Azərbaycan Teleradio Verilişləri QSC-nin bazasında təzə yaranmış və qısa müddətdə tamaşaçı rəğbəti qazanmış “Mədəniyyət” kanalı məhz belə önəmli missiyanın öhdəsindən uğurla gəlir. “Mədəniyyət” kanalının əsas məqsədlərindən biri zəngin Azərbaycan mədəniyyətinin bəşəri dəyərlərini dünyaya çatdırmaq, həmçinin dünya mədəniyyət incilərini ölkəmizdə təbliğ etmək, gənc nəslin bədii-estetik zövgünü formalaşdırmaqdır. Dövlət başçısı İlham Əliyev hakimiyyətə gəldiyi vaxtdan digər sahələrdə olduğu kimi mədəniyyət sahəsində də əsaslı islahatları sürətləndirməyə başladı. Kino, teatr, musiqi, tətbiqi sənət, tarixi abidələrin qorunması və bərpası ilə bağlı qəbul olunan dövlət proqramları və cənab Prezidentin mədəniyyət sahələrinin inkişafı ilə bağlı sərəncamları bir daha təsdiq edir ki, ölkəmizdə mədəniyyətə, mənəvi dəyərlərin qorunub saxlanmasına həqiqətən böyük qayğı var. Bu sərəncamlarda mədəniyyətimizin bütün sahələrinin inkişafına dövlət tərəfindən böyük dəstək verildiyi bir daha təsdiqlənir. “Mədəniyyət” kanalının açılması da dövlətimizin, onun başçısı İlham Əliyevin mədəniyyətə, incəsənətə göstərdiyi böyük diqqət və qayğının nəticəsidir. “Mədəniyyət” kanalının məhz Azərbaycan Televiziyasının nəzdində yaranması da təsadüfi deyildi. AzTV təkcə maddi-texniki baxımdan deyil, həm də yaradıcılıq baxımından ölkə teleməkanında təkanverici qüvvəyə çevrilib. Televiziyanın zəngin qızıl fondunda milli mədəniyyətimizin , incəsənətimizin inkişafında xüsusi xidmətləri olan insanlar haqqında müxtəlif lent yazıları, görkəmli sənətkarlarımızın ifasında muğamlar, bəstəkar mahnıları, müxtəlif opera vətamaşalardan nadir parçalar qorunub saxlanır. Bundan əlavə Azərbaycan Televiziyasının maddi texniki bazasının dünya standartlarına tam cavab verməsi, proqramların bütün dünyaya yayılmaq imkanı, uzun illər yığılıb-qorunan mədəniyyət nümunələrinə aid dəyərli lent yazılarının yalnız AzTV-də olmağı “Mədəniyyət” kanalının məhz Azərbaycan Televiziyasının nəzdində yaranmasını reallaşdırdı. Beləcə, “Mədəniyyət” kanali bütün dünyada seyr edilmək imkanı qazandı. Bu isə öz növbəsində mədəniyyətimizin dünya miqyasında daha geniş, möhtəşəm təbliği deməkdir. AzTV-də fəaliyyət göstərən Televiziya Akademiyası da “Mədəniyyət” kanalının peşəkar kadr potensialının təminatına rəvac verdi... Ulu öndər Heydər Əliyevin Azərbaycan mədəniyyətinin, incəsənətinin, milli mənəvi dəyərlərimizin qorunması, inkişafı və gələcək nəsillərə çatdırılması istiqamətində gördüyü əvəzsiz işlər uğurla davam etdirilir. Son illər Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə Azərbaycan mədəniyyətinin təbliği sahəsində çoxsaylı layihələr həyata keçirilir. “Mədəniyyət” kanalı fəlaiyyətə başladığı gündən mədəni həyatımızın əsl carçısı olmaq vəzifəsinin öhdəsindən gələ bilib. Paytaxtımızda və ölkəmizin dilbər güşələrində Heydər Əliyev Fondunun təşəbbüsü ilə keçirilən bütün irimiqyaslı mədəni tədbirlər məhz “Mədəniyyət” kanalının vasitəsilə tamaşaçılara çatdırılır. Bu sırada Heydər Əliyev fondunun təşəbbüsü ilə keçirilən respublika və televiziya muğam müsabiqələrini, Qəbələ musiqi festivalını xüsusi qeyd etmək lazımdır. Hazırda “Mədəniyyət” kanalı elmin, maarifçiliyin , Azərbaycan dilinin , tarixinin, mədəniyyət və incəsənətinin əsl təbliğatçısına çevrilib. “Mədəniyyət” kanalının film siyasəti böyük maraq doğurur. Bu kanalda insanın mənəviyyatına mənfi təsir edən filmlərə rast gəlmək qeyri-mümkündür. Burada insanı ruhən saflaşdıran, ona ali hisslər aşılayan və dünya kinosunun inciləri sayılan filmlər nümayiş etdirilir. Ümummilli liderimiz Heydər Əliyev həmişə deyərdi ki, millətin mədəniyyətini qorumaq təkcə mədəniyyət xadimlərinin, təkcə bu sahədə işləyən insanların, ziyalıların işi deyil, eyni zamanda dövlət rəsmilərinin, bütün dövlət strukturlarının, qurumlarının vəzifəsidir. Mədəniyyət millətin vizit kartıdır.

STRUKTUR

Ramil Adıgözəl oğlu Qasımov

 

 

Ramil Adıgözəl oğlu Qasımov 10 dekabr 1984-cü ildə Bakı şəhərində anadan olmuşdur. Professional səhnə fəaliyyətinə 1999-cu ildə Azərbaycan Dövlət Akademik Musiqili teatrında başlamışdır. Azərbaycan Dövlət Mədəniyyət və İncəsənət Universitetini opera və kamera ifaçısı, musiqişünaslıq ixtisası üzrə bitirdikdən sonra Gürcüstan Respublikasında Musiqi Akademiyasını vokal ixtisası üzrə magistr pilləsində təhsilini davam etdirmişdir. Eyni zamanda, ikinci təhsil olaraq, Azərbaycan Respublikası Prezidenti yanında Dövlət İdarəçilik Akademiyasının Politologiya fakultəsinin "Siyasi idarəetmə" ixtisasını bitirmişdir.

Ramil Qasımov 2004-cü ildən Azərbaycan Televiziyasında Cahangir Cahangirov adına xorun solisti kimi fəaliyyətə başlayıb. O, 2011-ci ildə Televiziyanın Musiqi kollektivlərinin bədii rəhbəri, 2012-ci ildə Səs yazma Evinin direktoru vəzifəsində,
4 noyabr 2015-ci il tarixindən isə Azərbaycan Televiziyası "Mədəniyyət" kanalının direktorudur.

“Mədəniyyət” kanalında fəaliyyətə başladığı müddətdən ölkədə bir çox festivalların, telemüsabiqələrin, eyni zamanda, “Əbədi Musiqi”, “Ötən illərin nəğmələri”, “Bakı gecələri”, “Romans müsabiqəsi”, “Bizi birləşdirən mədəniyyət”, “Xalq mahnıları”, “Orqan musiqisi”, “Azərbaycan vokalçıları”, “Milli nəfəs alətləri” festivallarının keçirilməsinin təşəbüskarı və idea müəllifidir.

Ramil Qasımov, eyni zamanda, Akademik Opera və Balet teatrının solisti, Azərbaycan Milli Konservatoriyasının baş müəllimidir. Beynəlxalq müsabiqələr laureatı,Azərbaycan Respublikasının əməkdar artistidir.

Rəhimli İlham Əziz oğlu

 

Rəhimli İlham Əziz oğlu 8 sentyabr 1949-cu ildə Yevlax rayonunun Malbinəsi kəndində doğulub.

Mirzağa Əliyev adına Azərbaycan Dövlət İncəsənət Universitetinin teatrşünaslıq fakültəsini qırmızı diplomla bitirib (1967 – 1972). Sənətşünaslıq üzrə elmlər doktorudur. Mədəniyyət və İncəsənət Universitetinin professorudur. Əməkdar incəsənət xadimidir, “Qızıl Dərviş”, “Humay”, “Cəfər Cabbarlı” mükafatları laureatıdır. Azərbaycan Teatr Xadimlərinin “Sənətkar” medalına layiq görülüb. Teatra, kinoya, rəssamlığa aid yüzə yaxın elmi-nəzəri kitabın, o cümlədən 22 monoqrafiyanın, beş dərsliyin müəllifidir. Həmçinin 5 cildlik “Azərbaycan teatr tarixi”, 3 cildlik “Azərbaycan Teatr Enciklopediyası”, 3 cildlik “Səhnə fədailəri”, 3 cildlik Akademik Milli Dram Teatrı”, “Opera və Balet Teatrı”, “Musiqili teatr”, “Tiflis teatrı”, “İrəvan teatrı”, “Təbriz teatrı” fundamental tədqiqat əsərləri var.

Müxtəlif vaxtlarda “Kommunist” (indiki “Xalq” qəzeti) qəzetində şöbə müdiri, “Azərbaycan” qəzetinin baş redaktoru, Prezident Aparatının humanitar siyasət şöbəsində işləyib. AzTV-nin Maarifçilik redaksiyasının baş redaktoru olub. “Mədəniyyət” telekanalı fəaliyyətə başladığı vaxtdan kanalın direktor müavinidir. Televiziyada “Sərbəst söhbət”, “Tetar”, “Pərdə açılanda” müəllif verilişləri olub.

İlham Rəhimli 2019-cu ildən prezident təqüdçüsüdür.

 

 

 

Quliyev Riad Pərviz oğlu

 

 

Quliyev Riad Pərviz oğlu 19 avqust 1977-ci ildə Bakı şəhərində ziyalı ailəsində anadan olub.

1997-ci ildə Bülbül adına orta ixtisas musiqi məktəbini fortepiano fakultəsi üzrə bitirib.
1995-ci ildə “Fransız” adlı bədii filmdə musiqi redaktor vəzifəsində çalışıb. 
1997-ci ildə Üzeyir Hacıbəyli adına Bakı Musiqi Akademiyasının fortepiano orqan ixtisasını ixtisasını bitirib. 
2000-ci ildə “İlin ən yaxşı konsertmeyster” müsabiqəsində laureat adına layiq görülüb.
2004-2010-cu illərdə Bülbül adına orta ixtisas musiqi məktəbində müəllim vəzifəsində çalışıb. 
2012-ci ildə Azərbaycan Televiziya və Radio Verilişləri Qapalı Səhmdar Cəmiyyəti “Musiqi və əyləncəli proqramları redaksiyası”nda baş redaktor müavini vəzifəsində çalışıb.
İkincici təhsil olaraq, Azərbaycan Respublikası Prezidenti Yanında Dövlət İdarəçilik Akademiyasının "Beynəlxal münasibətlər" fakültəsində təhsil alır.
2017-ci ildən “Mədəniyyət” telekanalının direktor müavini vəzifəsində çalışır.

Ailəlidir, iki övladı var.

 

 

 

Yaqubov Hikmət Əlisgəndər oğlu

 

 

Yaqubov Hikmət Əlisgəndər oğlu 4 avqust 1972-ci ildə Masallı rayonunun Birinci Yeddioymaq kəndində anadan olub.

1989-1994-cü illərdə Ə.Hüseynzadə adına Azərbaycan Dövlət Mədəniyyət və İncəsənət Universitetində təhsil alıb.

2005-2008-ci illərdə Azərbaycan Prezidenti yanında Dövlət İdarəçilik Akademiyasının “Dövlət idarəetməsi” fakultəsini fərqlənmə diplomu ilə bitirib.

1992-ci ildən başlayaraq Azərbaycan Dövlət Televiziyasında rejissor assistenti vəzifəsindən baş rejissor vəzifəsinə qədər yüksəlib. Müxrtəlif redaksiyalarda fəaliyyətini davam etdirib. 250-yə yaxın sənədli və televiziya filimi cəkib.

2016-cı ildən 2018-ci ilədək “Azərbaycan Televiziya və Radio Verilişləri” QSC-nin Bədii rəhbəri, 2018-ci ildən 2019-cu ilədək isə Baş Produseri vəzifəsində fəaliyyət göstərib.

Hal-hazırda "Mədəniyyət" telekanalının direktor müavini vəzifəsində çalışır.

Ailəlidir, iki övladı var.

 

 

 

Şahzadə Emil Bədəl oğlu

 

 

Şahzadə Emil Bədəl oğlu 2 avqust 1977-ci ildə Bakı şəhərində ziyalı ailəsində anadan olub.

1996-cı ildə Qərb Universitetinin “Siyasi elmlər” fakültəsinə daxil olub və “politologiya” ixtisasına yiyələnib.
Əmək fəaliyyətinə 2003-cü ildə “Space” Müstəqil Teleradio MMC-də başlayıb və  2010-cu ilə kimi telekanalın “Musiqili və əyləncəli” proqramlar departamentində aparıcı kimi fəaliyyət göstərib.
2010-cu ildən başlayaraq “Azərbaycan Televiziya və Radio Verilişləri” QSC-də aparıcı-müxbir vəzifəsində işləyib.

2014-cü ildən “Azərbaycan Televiziya və Radio Verilişləri” QSC-də “Mədəniyyət” telekanalının direktor müavini vəzifəsində calışır

Ailəlidir, bir övladı var.

 

 

 

Eləkbərova Lamiyyə Eləkbər qızı

 

 

Eləkbərova Lamiyyə Eləkbər qızı 2 sentyabr 1973-cü ildə Naxçıvan şəhərində anadan olub.
1990-cı ildə Naxçıvan Dövlət Musiqi Texnikumuna,1994-cü ildə isə Azərbaycan Dövlət Musiqi Akademiyasına qəbul olub. Akademiyanı bitirdikdən sonra Azərbaycan Dövlət Mədəniyyət və Incəsənət Universitetinə daxil olub.

1995-ci ildə Azərbaycan Televiziyasında fəaliyyətə başlayıb. 
2006-cı ildə Lider TV-də baş rejissor, daha sonra isə telekanalın direktor müavini vəzifəsində çalışıb.
2017-ci ildə İTV-də "Musiqi-əyləncə və Xüsusi Layihələr" departamentinin direktoru vəzifəsində işləyib.

2018-ci ildən “Azərbaycan Televiziya və Radio Verilişləri” QSC-də “Mədəniyyət” telekanalının direktor müavini vəzifəsində calışır.

 

 

 

Niftəliyev Bəhruz Allahverdi oğlu

 

 

Niftəliyev Bəhruz Allahverdi oğlu  8 may 1987-ci ildə Bakı şəhərində ziyalı ailəsində anadan olub.

2005-ci ildə Azərbaycan Dövlət  Mədəniyyət və İncəsənət Universitetinin (ADMİU) “Televiziya rejissorluğu” ixtisasına qəbul olub. Tələbəlik illərində  fəal gənc kimi “İlyas Əfəndiyev” adına xüsusi təqaüdə layiq görülüb.  Universitetin müvafiq ixtisası üzrə bakalavr və magistatura pillələrini fərqlənmə diplomu ilə bitirib. Hazırda ADMİU-nun dissertantıdır. Azərbaycan Yazıçılar Birliyinin üzvüdür.

Əmək fəaliyyətinə "Azərbaycan Televiziya və Radio Verilişləri" QSC-də müxbir kimi başlayıb. “Mədəniyyət xəbərləri” redaksiyasında redaktor, baş redaktorun müavini vəzifələrində çalışıb.

Hal-hazırda "Mədəniyyət" telekanalının direktor müavini vəzifəsində çalışır.

Ailəlidir, bir övladı var.

Həsənzadə Rövnəq İmran oğlu

 

 

Həsənzadə Rövnəq İmran oğlu 3 yanvar 1975-ci ildə Naxçıvan şəhərində anadan olub. 1991-ci ildə Hüseyn Cavid adına Naxçıvan şəhər 5 nömrəli orta məktəbi bitirib.  

1996-cı ildə Azərbaycan Dövlət İnşaat Mühəndisləri Universitetinin “Tikinti-iqtisad” fakültəsini mühəndis-iqtisadçı ixtisası üzrə bitirib.

2002-ci ildə Azərbaycan Dövlət Mədəniyyət və İncəsənət Universitetinin “Rejissorluq” fakültəsini televiziya rejissoru ixtisası üzrə bitirib.

1992-1993-cü illərdə Azərbaycan Dövlət Televiziya və Radio Verilişləri Komitəsində rejissor köməkçisi, 1993-1997-ci illərdə Azərbaycan Dövlət Akademik Milli Dram Teatrının texniki heyətində, 1997-2002-ci illərdə Cəfər Cabbarlı adına “Azərbaycanfilm” Kinostudiyasında rejissor köməkçisi, 2000-2005-ci illərdə “Space” Müstəqil Televiziya və Radio Yayımları Şirkətində əvvəlcə  rejissor assistenti, sonra isə “Musiqi və əyləncəli proqramlar” departamentinin böyük rejissoru, 2000-2001-ci illərdə Cəfər Cabbarlı adına İrəvan Dövlət Azərbaycan Dram Teatrında quruluşçu rejissor, 2005-2007-ci illərdə İctimai Televiziya və Radio Yayımları Şirkətində əvvəlcə rejissor, “Musiqi və əyləncəli proqramlar” departamentinin direktor müavini və direktoru, 2007-ci ildən Azərbaycan Televiziya və Radio Verilişləri Qapalı Səhmdar Cəmiyyətində ali kateqoriyalı rejissor, 1 iyul 2009-cu il tarixindən 4 noyabr 2015-ci il tarixinədək şirkətin “Musiqi və əyləncəli proqramlar” redaksiyasının baş rejissoru işləyib. 1 iyun 2017-ci il tarixindən “Mədəniyyət” Kanalının bədii rəhbəri vəzifəsində çalışır.

 

 

 

TV REDAKSİYALAR

Dilarə Səlim

“Xəbərlər” redaksiyasının baş redaktoru

 

Dilarə Səlim 15 avqust 1968-ci ildə Bakı şəhərində anadan olub.

Azərbaycan Pedaqoji, Xarici Dillər İnstitutun, Alman dili tərcüməsi fakültəsini bitirib.

1990-cı ildən AzTV-də çalışmağa başlayıb.

“Televiza”,“Kinofakt” və “Səhər” verilişlərində müəllif-aparıcı olub.

1994-cü ildə “Mir” Dövlətlərarası Teleradioşirkətinin Azərbaycan Milli Nümayəndəliyində şərhçi işləyib.

1997-ci ildə Almaniyanın Gustav Ştrezeman Universitetində televiziya jurnalisti fakültəsində kurslar keçib.

2000-ci ildə “ABA” televiziyasında “Kontra” tok-şousunun müəllifi və aparıcısı olub.

2001-ci ildə “İnternyus” televiziya şirkətinin Azərbaycan Təmsilçiliyində prodüser və aparıcı olaraq “Media və Mən” verilişini hazırlayıb.

2007-ci ildən AzTV-də “Səhər” proqramında müəllif və aparıcı, “Xəbərlər”də isə aparıcı kimi işləyib. Hazırda “Görüş yeri” verilişinin aparıcısıdır.

Ailəlidir, iki qızı var.

Ceyhun Dünyamalıyev

Baş Proqram Direktoru

 

Ceyhun Dünyamalı oğlu Dünyamalıyev 1983- cü ildə Naxçıvan Muxtar Respublikası, Şahbuz rayonunda anadan olub. 2000-ci ildə Bakı şəhəri 165 nömrəli tam orta məktəbi bitirib. 2008-ci ildə Azərbaycan Beynəlxaq Universitetini bitirib.
2006-2010-cu il Azərbaycan Televiziya və Radio verilişləri Qapalı Səhmdar Cəmiyyətində Baş proqram direktorluğunun efir koordinatoru, 2010-2015-ci il direktorluğun Buraxılış şöbəsi müdiri, 2015-2018-ci il Radio Verilişləri Baş Proqram direktoru, 2018-cil ildən Mədəniyyət  kanalının Proqram Direktoru vəzifəsində işləyir.

İki qız övladı var.

“Turan”  30 dəqiqə (türk dünyasına həsr olunur) müəllif Zərnişan Azayeva                        

“Teleafişa” 30-35 dəqiqə (maarifləndirici, aytaxtımızda baş verən ən son mədəniyyət xəbərləri) müəllif Ü.Zülfiqarova

“Kulis” 30 dəqiqə (xəbər, həftə ərzində dünyada baş verən mədəniyyət xəbərləri) X.Məmmıədova

“Zəmanə” 30 dəqiqə (tarixi-sənətli, XX əsrdə dünyada və Azərbaycanda baş verən tarixi hadisələr) müəllif G.Nəsib

“Balacam” 30 dəqiqə (maarifləndirici, uşaqları necə sağlam və xöşbəxt böyüdək) müəllif Ü.Zülfiqarova 

Sevinc Mütəllibova

"Maarifçilik" redaksiyasının baş redaktoru

 

“Maarifçilik” redaksiyası 2007-ci ilin aprelində yaradılıb. 

Bu redaksiya cəmiyyətimizdə bilik, savad və mədəniyyəti sistemli şəkildə təbliğ edən, estetik, etik, ictimai və bədii ideyaları formalaşdıran verilişlər hazırlayır. 

“Bağçılıq” kütləvi proqramdır. Ayda 4 dəfə efirə çıxır; 30 dəqiqə ərzində mövsümi bağçılığın vacib problemləri barədə maraqlı məlumatlar verilir, ayrı-ayrı bağ və bostan bitkilərinin becərilməsi öyrədilir, istixanaların işlədilmə texnologiyası aydınlaşdırılır.

Verilişin ssenari müəllifi Vüsalə İsmayılova, rejissoru Tərlan Tağıyevdir.

Azər Qismət

«Ədəbi-dram verilişləri» redaksiyasının baş redaktoru

 

«Ədəbi-dram verilişləri» redaksiyası ədəbiyyatın, incəsənətin, klassik və müasir yazarlarımızın ədədəbi irsinin təbliğinə xidmət edir.

Bu redaksiya «Vətəndaş», , «Qobustan», «Əbədi abidələr», «Zamanın sorağında» kimi daimi verilişlər hazırlayır. İl ərzində «Böyük ömrün davamı» film-tamaşası, «Qədim yurdun baharı», «Əbədi zirvə», «Danışır və göstərir Bakı!», «Tarixin yollarında», «Mətbuat fədaisi», «Ağ işığın möcüzəsi», «Doymadım bu dünyadan», «Bir ömrün xatirəsi» sənədli filmləri, «Əbədiyyət silsiləsindən» «Heydər Əliyev və Azərbaycan ədəbiyyatı», «Heydər Əliyev və Azərbaycan mədəniyyəti», “Heydər Əliyev və milli-mənəvi dəyərlərimiz», M.C.Paşayevə həsr olunmuş «Böyük fikrin karvanları» verilişləri hazırlanıb. Eyni zamanda tamaşaçılara «Ədəbi düşüncələr» telepritçasının M.Kazımbəy, S.Ə.Şirvani, Ş.İ.Xətai, M.Ş.Vazeh, X.B.Natəvan, Q.B.Zakir, Heyran xanım, N.Hikmət, A.İldırım, Ə.Kərim və digər görkəmli şəxsiyyətlərə həsr olunan xüsusi buraxılışları təqdim edilib.

Şəmsiyyə Fərhadqızı

“Uşaq və gənclik proqramları" redaksiyasının baş redaktoru

 

“Uşaq və gənclik proqramları” baş redaksiyasının əsas məqsədi Azərbaycanda həyata keçirilən dövlət gənclər siyasətini təbliğ etmək, cəmiyyətin aparıcı qüvvələrinin potensial imkanlarını üzə çıxarmaqdır. Redaksiyanın əsas istiqamətləri sırasında uşaq və gənclərin maarifləndirilməsi, onların nailiyyətlərinin tamaşaçılara çatdırılması dayanır. 

“Şirin yuxular” – Maarifləndirici proqram

Həftəiçi beş gün

Müəlliflər: Əliyeva Zərifə, Əlifov Nazim

Aparıcı: Ağayeva İradə

Məqsəd: Kiçikyaşlı uşaqların  zehni inkişafına, dünyagörüşünün formalaşmasına kömək etmək. İradə nənənin söylədiyi folklor nümunələri, cizgi filmi qəhrəmanları ilə tanışlıq əsasında böyüməkdə olan nəslə əxlaqi-etik vərdişlər aşılanır, inkişafetdirici tapşırıqlar, öyrədici video-çarxlar vasitəsi ilə onların bilik dairəsi genişləndirilir.

 

Nəcibə Əlixanova

"Səhər proqramları" redaksiyasının baş redaktoru

 

Redaksiyanın hazırladığı “Səhərçağı” proqramı 2019-cu il martın 1-dən etibarən efirdədir.

Həftəiçi  5 gün  3 saat (saat 8.00 – 11.00) canlı olaraq yayımlanan proqram respublikamızın, eləcə də dünyanın mədəniyyət aləmindən ən son yenilikləri tamaşaçıların diqqətinə çatdırır. Teleməkanda mədəniyyətlə bağlı ilk səhər proqramı olan “Səhərçağı”nın gündəmini mədəni həyatda baş verən bütün hadisələr - beynəlxalq tədbirlər, festivallar, forumlar, müxtəlif xalqların mədəniyyət günləri təşkil edir. Ölkəmizə təşrif buyurmuş müxtəlif mədəniyyət xadimləri, o cümlədən Azərbaycanda fəaliyyət göstərən diplomatik korpusların nümayəndələri belə öz yaradıcı fəaliyyətləri ilə tamaşaçıların görüşünə gəlirlər. Ölkəmizin ərazisində yaşayan azsaylı xalqların, millətlərin zəngin mədəniyyətindən xəbər verərək, Azərbaycanın apardığı multikulturalizm siyasətinə töhfə vermək proqramın başlıca missiyalarındandır.

“Ölkəmizi tanıyaq və tanıdaq” adı altında paytaxt və regionlardakı qədim və müasir məkanlara, mədəniyyət müəssisələrinə bağlanaraq, bura ezam olunmuş müxbirlərlə canlı bağlantılar yaradılması tamaşaçılar tərəfindən rəgbətlə qarşılanır.

“Kinoxəbər”,“Dünya mətbəxi”, “Vernisaj”, “Afişa”, “ Ötən həftənin mədəniyyət yekunu”, “Bestseller”, “Emalatxanada bir gün” və digər rubrikalarla mədəniyyətin müxtəlif sahələrinə diqqət ayrılır.

 

Hikmət Şahbazov

"Musiqi və əyləncəli proqramlar" redaksiyasının baş redaktoru

 

Redaksiya Azərbaycanın klassik, xalq və pop musiqisini, görkəmli sənətkarlarımızın yaradıcılığını təbliğ edən veriliş və proqramlar hazırlayır, ölkəmizdə keçirilən müxtəlif beynəlxalq festivalları tamaşaçılara təqdim edir.

Redaksiyanın təşkilatçılığı ilə keçirilən muğam müsabiqələri ictimaiyyət arasında böyük nüfuz qazanıb və ölkə teleməkanında ən uğurlu layihə kimi qiymətləndirilir.

Redaksiyanın hazırladığı "Musiqi xəzinəsi" verilişi - xalq artisti, Azərbaycan Bəstəkarlar İttifaqının katibi Sərdar Fərəcovun təqdimatında Azərbaycan və Qərbi Avropa bəstəkarlarının həyat və yaradıcılığına nəzər salınır, əsərləri müzakirə olunur. Ayda 4 dəfə, xronometraj isə 75 dəqiqə təşkil edir. Veriliş ssenari müəllifi Sərdar Fərəcovdur.

"Musiqili ekran" verilişi - musiqişünas, professor Lalə Hüseynovanın təqdimatında dünya və Azərbaycan bəstəkarlarının ekran əsərlərində müxtəlif səhnələrin, interpretasiyaların müzakirəsi təqdim olunur. Veriliş ayda 2 dəfə olmaqla efirə gedir, xronometraj isə 60 dəqiqə təşkil edir. Ssenari müəllifi Lalə Hüseynovadır

"Məclisi-üns" verilişi Əruz şeiri və Azərbaycan muğamının vəhdətinə həsr olunur. Həftədə bir dəfə 60 dəqiqə efirdə olur. Verilişin müəllifi Yaqub Əliyevdir.

"Yada düşər xatirələr" - Veriliş tanınmış musiqiçilər, rəqqas, bəstəkar, dirijor, eləcə də Televiziyada çalışmış müxtəlif sənət adamları, onların fəaliyyəti və yaradıcılığından bəhs edir. Həftədə 1 dəfə efirdədir. Verilişin müəllifi  Yaqub Əliyevdir.

"Bizi birləşdirən mədəniyyət" verilişi "Mədəniyyət" kanalı və Mədəniyyət Nazirliyinin birgə layihəsi əsasında hazırlanır. Verilişin əsas mövzusu ölkəmizdə mədəniyyətin inkişafı və təbliği, eyni zamanda zəngin mədəni tariximizi, əsrlərdən süzülüb gələrək bu günümüzə çatmış qədim milli-mənəvi dəyərlərimizi, tarixdə iz qoymuş sənətkarlarımızı, müasir dövrdə formalaşan, yetişən istedadlı gənclərimizi xalqımıza və dünyaya tanıtdırmaqdır. Həftədə 1 dəfə 60 dəqiqə olmaqla yayımlanır.  Verilişin müəllifi Ramil Qasımovdur.

Redaksiya Azərbaycanın klassik, xalq və pop musiqisini, görkəmli sənətkarlarımızın yaradıcılığını təbliğ edən veriliş və proqramlar hazırlayır, ölkəmizdə keçirilən müxtəlif beynəlxalq festivalları tamaşaçılara təqdim edir. Redaksiya «Məclisi-üns», “Yada düşər xatirələr”, “Musiqi xəzinəsi” adlı verilişlərlə yanaşı, “Azərbaycan, yurdum mənim”, «Muğam dünyamız», “Musiqi dəqiqələri” , “İnstrumental musiqi” adlı konsert proqramları ilə tamaşaçıların görüşünə gəlir. Redaksiyanın təşkilatçılığı ilə keçirilən muğam müsabiqələri ictimaiyyət arasında böyük nüfuz qazanıb və ölkə teleməkanında ən uğurlu layihə kimi qiymətləndirilir. 

“Kinoproqramlar və dublyaj” redaksiyası kino sənətkarlarının, milli, xarici filmlərin tamaşaçılara tanıdılması, təbliği sahəsində fəaliyyət göstərir.

“Kinoproqramlar və dublyaj” redaksiyasında çalışan peşəkar aktyor, rejissor, tərcüməçi heyəti mütəmadi olaraq xarici filmləri doğma dilimizdə tamaşaçılara təqdim edir.

Redaksiyanın hazırladığı "Film haqqında film" verilişi milli filmlərimizin çəkiliş proseslərindən,kadrarxası məqamlarından bəhs edir. Veriliş ayda 2 dəfə 30 dəqiqə olmaqla efirə çıxır. Ssenari müəllifi Sevda Ağazadədir.

"Kinomuzda doğma melodiyalar" verilişində bəstəkar Cahangir Cahangirovun "Dağlarda döyüş","Dəli Kür" və digər bəstələdiyi kino musiqilərdən bəhs edilir. Verilişin ssenari müəllifi Salar Aslanovdur.

"Dünya kino ulduzları" verilişi isə ayda bir dəfə efirə çıxır. Verilişdə məşhur aktyor  və aktrisaların həyat və yaradıcılığından bəhs edilir.
Ssenari müəllifi  Afaq Əhmədova

Redaksiyada, həmçinin, sosial çarxlar və qısametrajlı filmlərin istehsalına başlanılıb.